Narahat ayaqlar sindromu nədir?

Narahat ayaqlar sindromu nədir?

15 Dekabr 2023

Narahat ayaqlar sindromu necə bir xəstəlikdir?

Bu, yuxu ilə əlaqədar meydana gələn bir hərəkət pozğunluğudur. Narahat ayaqlar sindromundan əziyyət çəkən xəstələr gecələr yatarkən ayaqlarını dayanmadan hərəkət etdirir. Onlar ayaqlarında uyuşma və qıcıqlanma hissindən əziyyət çəkir.

Bu, xroniki bir xəstəlikdir?

Bu xəstələrin bəziləri hər gecə eyni vəziyyətdən şikayət etsə də, bəziləri bu ağrıların və narahatlığın hər gün baş vermədiyini bildirir. Narahat ayaqlar sindromunun dözülməz həddə çatması insanda yuxu rejiminin pozulmasına, yuxusuzluq əlamətlərinin qabarıqlaşmasına səbəb olur. Hətta elə vaxt olur ki, bu xəstələr təkcə yatanda yox, səyahət edəndə də əziyyət çəkirlər. Bəziləri rahat maşın sürə bilmir, maşın sürməkdən də qorxur, bəziləri məclislərdə oturarkən narahatlıq hissi keçirir. Əlavə olaraq günlərdir çəkən yuxu pozuntuları xəstəni depressiyaya sala bilər.

Narahat ayaqlar sindromu hansı insanlarda görülür?

Xəstəlik qadınlar və kişilərdə eyni dərəcədə görülməkdədir. Hər 100 nəfər insandan 3-4-ündə bu xəstəlik öz əlamətlərini göstərir. Əgər ailədə narahat ayaqlar sindromu mövcuddursa, bu, uşaqlarda da özünü göstərə bilər. Ona görə uşaqların ayağında olan hər ağrını adi ağrı kimi qəbul edib, müayinədən imtina etmək düzgün deyildir.

Narahat ayaqlar sindromunun yaranma səbəbləri

Narahat ayaqlar sindromunun yaranmasına təsir göstərən digər xəstəliklər haqqında məlumatlı olun:

Bədəndə vitamin çatışmazlığı, ayaqlarda qan dövranının pozulması, əzələ xəstəlikləri, böyrək xəstəliyi, dəmir çatışmazlığından yaranan problemlər və s.

Xəstəliyin müalicəsi üçün ilk növbədə narahat ayaqlar sindromunun xəstənin bədənindəki digər xəstəliklərdən qaynaqlanıb-qaynaqlanmadığı müəyyən olunmalıdır. Daha sonra düzgün diaqnoz ilə müalicəyə başlamaq yaxşı nəticə verəcək.